Oʻzbekiston Respublikasi Prezidenti Shavkat Mirziyoyev raisligida joriy yilning 4-mart kuni oliy oʻquv yurtlari talabalari bandligini taʼminlash boʻyicha ustuvor vazifalarga bagʻishlangan videoselektor yigʻilishida belgilab berilgan topshiriqqa muvofiq, Toshkent moliya institutida talabalarning boʻsh vaqtlarini mazmunli oʻtkazish hamda ularni qoʻshimcha ish bilan taʼminlash boʻyicha manzilli chora-tadbirlar ishlab chiqilgan.

Institut tomonidan mazkur chora-tadbirlar asosida mart, aprel oylari davomida talabalar bilan ish beruvchi korxona va tashkilot vakillari uchrashuvlari tashkil etildi.

Oʻtkazilgan tadbirlar davomi sifatida joriy yilning 17-18-may kunlari Toshkent shahar bandlik bosh boshqarmasi bilan hamkorlikda Toshkent shahri barcha tumanlari “Aholi bandligiga koʻmaklashish markaz” lari rahbar xodimlari va institut talabalari uchrashuvi tashkil etildi. Mazkur uchrashuvda ishga kirish istagini bildirgan talabalarga korxona va tashkilotlardagi moliya-iqtisod yoʻnalishlari boʻyicha 3500 yaqin boʻsh ish oʻrinlari toʻgʻrisida maʼlumotlar berildi. Tadbirning birinchi kuni 200 nafar talabaga Toshkent shahri tumanlari “Aholi bandligiga koʻmaklashish markaz” lari tomonidan ishga yuborilganlik toʻgʻrisida yoʻllanmalar berilib, ishga joylashishiga amaliy yordam koʻrsatildi.