Toshkent moliya institutida 2022-yil 22-aprel kuni “Oʻzbekiston Respublikasida soliq maʼmuriyatchiligi samarali faoliyatini taʼminlash: nazariy-konseptual asoslar va amaliyot muammolari” mavzusida respublika ilmiy-amaliy konferensiyasi oʻtkazildi.

Konferensiyada Toshkent moliya instituti Ilmiy ishlar va innovatsiyalar boʻyicha prorektor i.f.d., dos. A.Islamkulov, Oʻzbekiston Milliy Universiteti oʻquv ishlari boʻyicha prorektori, i.f.d., prof. Sh.Toshmatov, Davlat soliq qoʻmitasi huzuridagi Fiskal instituti “Soliqlar va soliqqa tortish” kafedrasi mudiri, i.f.d., prof. I.Niyazmetov, Oʻzbekiston Respublikasi Moliya vazirligi huzuridagi Byudjet-soliq tadqiqotlari instituti bosh mutaxassisi, i.f.d., prof. S.Voronin, mutaxassis tayyorlovchi kafedra mudirlari,  professor-oʻqituvchilar, tayanch doktorantlar, mustaqil izlanuvchilar, tadqiqotchilar, magistrlar hamda talabalar ishtirok etishdi.

Plenar yigʻilishdan soʻng, quyidagi seksiyalarda muhokamalar davom etdi:

• Taraqqiyot strategiyasini samarali amalga oshirishda byudjet-soliq siyosatini takomillashtirishning ustuvor yoʻnalishlari;
• Raqamli iqtisodiyot sharoitida samarali soliq maʼmuriyatchiligi faoliyatini taʼminlashning nazariy-konseptual asoslari;
• Soliqqa tortish tizimi amaldagi holatining oʻziga xos jihatlari;
• Soliq maʼmuriyatchiligini tashkil etishning ilgʻor xorij tajribasidan mamlakatimiz soliq tizimini takomillashtirishda foydalanish istiqbollari;
• Raqamli iqtisodiyot sharoitida bank, moliya hamda buxgalteriya hisobini rivojlantirishning dolzarb muammolari.

Mazkur ilmiy-amaliy konferensiyada mamlakatimizda jahon andozalari talablariga mos keluvchi soliq maʼmuriyatchiligi faoliyatini taʼminlashning zamonaviy, samarali usul va vositalarini amaliyotga joriy etish muammolari muhokama qilindi.

Konferensiya ishida soliq maʼmuriyatchiligi amaliyotini raqamlashtirish samaralarini asoslash hamda “soliq toʻlovchilar va soliq organlarining hamkorlikda oʻsishga asoslangan yangicha muloqoti” imkoniyatlarini oshirish boʻyicha taklif va tavsiyalar berildi.